Oskar tantanasında - kötelmägän xäl
Tanılğan aktyer Uill Smit säxnägä çığıp alıp baruçığa suqtı
Oskar büläklären tapşıru tantanasında kötelmägän xäl buldı.
“İñ yaxşı dokumental’ fil’m” bülägen täq’dim itüçe komediyäçe Kris Rok aktyer Uill Smitnıñ awırtu säbäple çäçsez qalğan xatını Djada Pinkett Smittan kölde. Ul anı “Ğaskäri Djeyn” fil’mındağı Djemi Murnıñ küreneşe belän çağıştırdı häm kartinanıñ däwamında töşärgä kiräklegen alğa sörep şayarttı.
Berawıq tınlıqtan soñ Uill Smit säxnägä çığıp Kris Roknıñ yañağına suqtı häm “Xatınımnıñ isemen awızıña alası bulma” dide. Bu mizgelneñ videoları sośial’ mediada zur tizlek belän taraldı.
Alopeśiyä çirenä duçar bulğan aktrisa Djada Pinkett Smit 2018nçe yılda awıruı turında kiñ cämäğat’çelekkä citkerde.
Süz uñayınnan, 94nçe Oskar tantanasında Uill Smit “Patşa Riçard” fil’mındağı role belän “İñ yaxşı ir-at aktyer” bülägen aldı.
