“Xäzer êlekkegä qarağanda tağın da kübräk dialogqa ixtıyac bar”

Sobacı bıyıl 5nçese "Köç häm paradoks: 21nçe ğasırda zur strategiyanı añlaw” teması belän onlayn oyıştırılğan “TRT World Forum 2021”neñ açılış çığışın yasadı.

30dan kübräk ildän 100gä yaqın çığış yasawçını qabul itüçe “TRT World Forum”da ike kön buyı böten keşelekne qızıqsındırğan global’ problemalarnıñ bäxäsläşeläçägen belderüçe Ğomum mödir dönyanıñ xäzer êlekkegä qarağanda tağın da kübräk dialogqa, bäxäskä, urtaq töple aqılğa, fiker almaşuğa häm yaña añlayış qamilläşterügä ixtıyacı buluına basım yasadı.

20nçe ğasır azağınnan birle däwlätlärneñ moñarçı hiç oçraşmağan, böten keşelekne qızıqsındırğan qayber urtaq problemalar aldında toruın iskärtep uzuçı Sobacı: "Global’ terrorçılıq, “Kovid-19” kebek kizü xastalıqları, êkologik fäläqätlär, dönyaküläm cılınu, internettä yasalğan cinayätlär häm kiber höcümnär, massaküläm migraśiya häm keremnärne bülüdäge ğadelsezlek kebek milli çiklärne uzğan qatlawlı problemalar global’ säyäsi häm iq’tisadi sistemanı küp külämle krizislar häm qurqınıç êlementlar aldında qaldırdı. Bügenge köndä xalıqara däräcädä problemalarnıñ çişeleşe öçen xezmättäşlek häm üzara bäyläneş alğı planğa çığa. Dön’yaküläm iq’tisadi häm säyäsi sistemanıñ êffektivlığı yuğarı däräcäle, kiñ qırlı häm özleksez global’ xezmättäşlekne nigez itep aluına bäyle”, - dip äytte.

Sobacı “TRT World Forum” belän global’ häm regional’ problemalarnı küp tawışlı häm küp ülçäwle perspektivada xalıqara cämäğätçelekkä täq’dim itülärenä iğ’tibarnı yünältep: "Keşegä yünälgän tapşırular añlayışıbız belän, uñaysız geografiyalarnıñ, cämğiyätlärneñ häm şäxeslärneñ tawışı bulırğa tırışabız. Matbuğat nigezlärebez qısalarında dönyabızğa yanawçı böten krizislarğa qarata sizgerlegebezne televideniye häm radio kanallarıbız, sanlı platformalarıbız belän dönyanıñ 7 qıytğasına 41 teldä häm şiwädä citkeräbez”, - dip belderde.

Şuşı barışta tapşırularnı äzerläwçelärgä dä zur cawaplılıq turı kilüenä basım yasawçı Sobacı: "Bügenge kön problemaların yaqtırtuçı, ictimağıy häm global’ añlawçanlıqnıñ artuına öleş kertüçe yaña näşriyätçelek añlayışı sanlı idarä itü çorınıñ ayırılğısız öleşenä äylände. Bu cähättän “TRT World Forum”nı kiläçäkneñ şäkellänüendä, formalaşuında fiker bäxäse platforması bularaq bik qaderle küräbez”, - dip äytte.