Futbolçı Salanıñ üleme belän bäyle yaña detal'lär açıqlandı

Oçqıç qazasında ğomere özelgän argentinalı futbolçı Êmiliano Sala häm pilot Dêvid İbbotsonnıñ hälakättän alda yuğarı külämdä uglerod oksidı gazı sulawğa duçar buluı açıqlandı.

Angliyä hawa qazaları tikşerü oyışması tarafınnan bastırılğan xisapqa qarağanda, Salanın qanında älege gaz 58% däräcädä.   

Xisapta äytelgänçä, mondıy yuğarı külämdä uglerod oksidı huştan yazu, añnı yuğaltu häm yöräk öyänägenä säbäpçe bula. Älegä oçuçınıñ mäyete tikşerelmägän. Ämma pilot belän yulçını ayıruçı kabina bulmawı öçen anıñ da şundıy uq xälgä qaluı farazlana. Gaz belän ağulanğan oçuçınıñ manevr yasaw säläte ähämiyätle ülçämdä kimi yäisä bötenläy yuqqa çığa. Belgeçlär Sala belän İbbotsonnıñ bärelgänçe ük gazdan ülgän buluın da uylıy.

Xisaptan soñ futbolçınıñ ğailäse belderü yasadı. “Oçqıçnıñ êçendä şul däräcädä yuğarı uglerod oksidı gazı buluı açıqlanu bu waqıyğa xaqındağı şöbhälärebezne arttıra. Gaznıñ oçqıç êçenä niçek kerüe häm Êmilianonıñ ni räweşle ülüe tikşerü barışında açıqlanırğa tiyeş,”-di alar.

İsegezgä töşeräbez, argentinalı futbolçı Angliyä prem’yer-ligası komandası Kardiff Siti tarafınnan 19nçı ğıynvarda klub öçen rekord bulğan summa 15 million sterlingqa Nantestan transfer itelde. Ul utırğan oçqıç isä 2 kön ütkäç - 21nçe ğıynvar kiçendä - Franśiyäneñ Nantes şähärennän Uêl’snıñ başqalası Kardiffqa taba xäräkät itkändä dingez östendä yuqqa çıqtı.

3nçe fevral’dä hälakät urını bilgelände, 6sında isä tabılğan cansız gäwdäneñ Salanıqı buluı açıqlandı. Pilotnıñ mäyetenä älegä ireşä almadılar.