"Törkiyä sıyınuçılarnıñ universitetta belem alu däräcäsendä rekord quya"

Çit illärdä yäşäwçe töreklär häm tuğandaş cämğiyät’lär başlığı Abdullah Ärän Törkiyädä 170 ildän 16 meñ studentnıñ belem aluın belderde.

Abdullah Äran bu xaqta Berläşkän Millätlär Oyışması qaçaqlar yuğarı komissariatı, Törkiyä teleradiokompaniyäse TRT World Research Centre häm TRT World Citizen xezmättäşlegendä oyıştırılğan “Xalıqara saqlaw astındağı uquçı yäş’lärneñ yuğarı belem aluı konferenśiyäse”neñ açılışında yasağan çığışında citkerde.

Çit illärdä yäşäwçe töreklär häm tuğandaş cämğiyät’lär başlığı  2011 nçe yıldan birle “Törkiyä stipendiyäläre” sisteması buldıruların häm bik küp illärdän kilgän uquçı yäş’lärgä stipendiya birülären añlatıp tübändägelärne citkerde: “Xäzerge waqıtta 170 tän kübräk ildän kilgän uquçı Törkiyädä stipendiyäle uqıy. Alarnıñ sanı 16 meñ “.

Ärän Törkiyäneñ ilebezgä sıyınuçılar belän bäyle 8 yıl  bik uñışlı ,näticäle êşçänlek başqaruın ,monıñ xalıqara  däräcädä yuğarı bäyälänüen xäterlätte.

Törkiyäneñ barlıq oyışmalarınıñ professional’ räweştä zur tırışlıq kürsätüen beldergän Ärän süzen tübändägeçä däwam itterde: “Bez Berläşkän Millätlär Oyışması qaçaqlar yuğarı komissariatı, Awrupa Berlege fondları aşa şaqtıy studentqa stipendiya birü mömkinlege tudırabız.Törkiyädä sıyınuçılarnıñ universitetta belem alu däräcäse 6% täşkil itä  häm ul mondıy kürsätkeç belän rekord quya”.

Berläşkän Millätlär Oyışması qaçaqlar yuğarı komissariatınıñ Törkiyä wäkile Katharina Lumpp isä dönya külämendäge qaçaqlar belän bäyle mäğ’lümatlarnı urtaqlaşıp,sıyınıçı balalardan 61%ınıñ başlangıç mäktäptä uquın, 23%ınıñ urta belem aluın, yuğarı belem aluda isä bu kürsätkeçneñ barı tik 1%  buluın citkerde.

Lumpp Törkiyädä waqıtlıça saqlaw häm yaqlaw astındağılarnıñ belem alu däräcäseneñ bik yaxşı buluın assızıqladı.