İngliz jurnalistları törek fil'mın qarıy

Çanakkalä suğışları waqıtında Avstraliyädä yäşägän ike törekneñ illäre öçen can atuları xaqında söyläwçe “Törek tuñdırması” fil’mı irtägä ingliz häm törek jurnalistlarına maxsus kürsäteläçäk.

Yunus Ämrä institutı aprel’ ayında Angliyä başqalası Londonda “Törek fil’mnarı atnalığı” ütkäräçäk. Anıñ qısalarındağı berençe çaranı inde irtägä ük uzdıralar. Kartinanı Regent strit kinozalında kürsätäçäklär.  

Fil’mnı qarağannan soñ jurnalist Filip Bergson citäkçelegendä äñgänä bulaçaq. Anda rejissyer Can Ulkay, töp rol’dä uynağan ingliz Uill Torp häm başqa aktyerlar qatnaşa.

Fil’mnı Londonnıñ qalğan tamaşaçıları 28nçe aprel’dä kürä alaçaq.