Xäydärpaşada 1000 yıllıq skelet

İstanbul Xäydärpaşa timer yul stanśiyäse tiräsendäge arxeologik qazınularda 2 meñ yıllıq buluı farazlanuçı divar häm ber skelet tabıldı. Älege keşe söyäkläreneñ cir astında yaqınça 1000 yıl yatuın uylıylar. Anıñ östendä islemaylı kol’ye dä bar.

Arxeologik qazınular 11nçe mayda başlanğan ide. Xäzergä qadär distälärçä qaber qaldıqları tabıldı. İñ sonğı skelet aralarında iñ yaxşı saqlanğanı sanala.

Qazınular waqıtında Vizantiyä çorına qarawçı ber çişmä dä çıqtı. Tikşerenü mäydanındağı su kanalları anıñ belän bäyläneşle. Bu İstanbulda äle haman suı ağuçı berdänber Vizantiyä çişmäse. Xätta suınıñ êçärgä yaraqlı sıyfatta buluı belderelä. Arxeologlar äytkänçä,  bu ul çordağı arxitektura êşçänlegeneñ niqadär centekle başqarıluın kürsätä.  

Qazınu mäydanında 3 müzey belgeçe, 18 irekle arxeolog, 1 restavrator, 1 fotorässam häm yaqınça 400 êşçe tırışlıq quya. Stanśiyäneñ perronnarı bulğan urında Êllenistik çorğa qarawçı podium kilep çıqtı. Ul timer qısqıçlar belän ber-berenä totaştırılğan 4 taş bloktan tora.

Perronnıñ tön’yağındağı qazınularda isä zur divar çıqtı. Ul tigez itep kiselgän taş bloklardan bik osta räweştä salınğan. Anın ozınlığı 100, kiñlege 3 metr. Anın älegä qaysı çorğa qarawı açıqlanmadı. Arxeologlar anıñ 2 meñ yıllıq ütkäne bulğan qal’gä divarı buluın farazlıy. Anıñ aldındağı tufraq tözeleşen öyrängännän soñ, belgeçlär bu cirdän port başlanuın belderde. 

İbrahimağa cirlegendä yasalğan qazınularda Urta Vizantiyä çorına qarawçı keramik kirpeç miçe tabıldı.

Qazınu mäydanında barğan êş waqıtında xäzergä qadär yaqınça 2 meñ dana täñkä çıqtı. Altın häm kömeş täñkälärne centekläp çistartıp nomerlıylar. Qayber aqçalar ayıruça yaxşı saqlanğan. Alarnıñ östendäge yazularınnan qayda basıluı häm nindi çorğa qarawları bilgele. Arada miladtan soñ 610-641nçe yıllarda 3nçe Konstantinos xakimiyäte waqıtında, miladtan soñ 527-565nçe yıllarda 1nçe Yustinianus çorına qarawçı täñkälär bar.