Şineyd O’Konnor möselmanlıqqa küçte

Böten tön’yağa tanılğan İrlandiyä cırçısı Şineyd O’Konnor möselman dinenä küçüen belderde. Cirle mäğ’lümat çaralarında çıqqan yazmalarğa qarağanda, sänğat’çe bu xaqta üzeneñ canatarlarına Twitter aşa xäbär itkän. “Möselman buluım belän ğorurlanam. Här aqıllı dinle keşe tabiğıy bularaq şundıy näticägä kilergä tiyeş. Barlıq izge yazmalar bezne İslamğa iltä. İslam barlıq başqa izge kitaplarnıñ kiräksez ikänen kürsätä,”-dip yaza 51 yäş’lek cırçı xanım. Ul möselmanlıqqa küçkännän soñ yaña isem aluın da belderde. Twitterda  Şüheda Davitt iseme astında başına yawlıq yapqan fotoların urnaştırdı. Ber räsem astına sänğat’çe  “Bäxetle” dip yazğan. Cırçı üzeneñ bu adımına teläktäşlek kürsätkän häm sośial’ çeltärdä cılı süzlär äytkän möselmannarğa räxmäten citkerde.

 Şineyd O’Konnor 1990nçı yıllarda katoliklıqnı qabul itep Magda Davitt isemen alğan ide.