Nobel’ premiyäse qazanğan xatın-qızlar arakanlılar yanında

Nobel’ premiyäle Täväkkül Karman, Şirin Êbadi häm Mairad Magwayr Bangladeşta arakanlı möselmannar yäşägän lager’larda buldı. Alar xalıq belän söyläşep, xällären beleşte. Täväkkül Karman soñınnan Anadolu agentlığına birgän interv’yuda: “M’yanma armiyäseneñ arakanlı möselmannarğa qarşı êşlägän cinayät’läre arasında küpläp üterü, küpläp köçläw, keşelärne yandıru, balalarnı äti-äniseneñ küz önendä asu yäisä, kiresençä, äti-änilären balalarnıñ qarşında üterü, yortlarnı yandıru, milekne tartıp alu, xalıqnı küçärgä mäcbür itü bar”,-dip sanap kitte.  Lager’da oçraşuda ber xatın Karmanğa xärbilärneñ keçkenä ulınıñ muyının kisep, cansız gäwdäsen yılğağa atuların söylägän. Äni keşene isä monı qarap torırğa mäcbür itkännär. M’yanma armiyäse xärbiläreneñ bötenläy nänilärne dä küz aldında köçläwlären söyläwçe änilär bik küp.

Karman sıyınu urınnarındağı iñ töp ixtıyaclarnıñ da citmäwen belderde. Ul İslam däwlätlären M’yanma xökümätenä tağın da nığraq basım yasarğa çaqıra.

   Mairad Magwayr da köçläwgä duçar itelgän häm ğailälären yuğaltqan bik küp xatın-qızlarnı tıñlağannan soñ: “M’yanma xärbiläre xätta bäbäylärne ütergän. Bu älege xökümät häm armiyäse tarafınnan êşlängän açıqtan-açıq genośid”,-dide.

İrannan advokat häm keşe xoquqların yaqlawçı Êbadi isä Bangladeş citäkçelege häm xalqına möxacirlärne sıyındıruları öçen räxmät belderde. Ul kilüçelärneñ kön sayın artuın häm bu xälgä çara tabu kiräklegen söyli.