Bötendön’ya bankı Paqıstanğa 2 milliard dollar birä
Bu aqçalar su basu qorbannarınıñ reabilitśiyäse häm asqormanı qabat tözü öçen birelä
Bötendön’ya bankı Paqıstanğa su basu qorbannarınıñ reabilitśiyäse häm asqormanı qabat tözü öçen 2 milliard dollar bülenäçägen xäbär itte.
Milli matbuğattağı xäbärlärgä qarağanda, Paqıstannıñ kerem häm finans ministrı İsxak Dar başqala İslamabadta Bötendön’ya bankınıñ ildäge mödire Naji Benxassine belän oçraştı. Anda älege mäs’älä xaqında fiker alıştılar.
Kerem häm finans ministrlığınnan belderülärençä, Bötendön’ya bankı wäğ’dä itelgän summanıñ 1 milliard yarım dolların bıyıl biräçäk.
Älege xäbär Aziyä üseş bankınıñ Paqıstanğa yaqınça 2 milliard yarım dollar kredit täêmin itäçäge turındağı belderüdän soñ kilde.
İsegezgä töşeräbez, Paqıstanda 14nçe iyün’dä başlanğan musson yañğırları arqasında 1700 keşe ülde, yaqınça 13 meñ keşeneñ sälamätlege zarar kürde.
