Laboratoriyada yasalğan "tawıq ite" satuğa çığa

Singapur Amerikadağı ber şirkätneñ laboratoriyädä citeştergän tawıq iten satuğa röxsät birde. İlneñ azıq-tölek agentlığınnan belderülärençä, “Eat Just” yasap çığarğan älege yasalma “it” sälamätlek öçen zararlı tügel ikän.  Anı laboratoriyädä xaywannarnıñ muskulı küzänäklärennän citeştergännär.

“Eat Just”nıñ yuğarı idaräçese Djoş Tetrik äytüençä, yaña produkt tizdän Singapurdağı ber restoranda täq’dim itelä başlayaçaq. Ul yasalma itne “global’ azıq-tölek industriyäse öçen yaña çor açuçı” bularaq bäyäli. Şirkät başqa däwlätlärneñ dä itne satuğa röxsät itäçäklären kötä. Tetrik produktnı citeştergändä bernindi antibiotik qullanmawların citkerde.  

Şirkät itneñ qayçan satuğa çığaçağı xaqında belderü yasamadı. Anıñ bäyäse berençe sıynıf tawıq ite belän ber ük bulır dip uylanıla.

Angliyäneñ äydäp baruçı banklarınıñ berse Barkleys xaywan suymıyça ğına citeşterelä torğan it bazarınıñ zurlığı 10 yıl êçendä 140 milliard dollarğa citär dip farazlıy.