"Soğud Ğaräbstanına qoral satmayaçaqbız"
Germaniyä Qaşıqçı waqıyğasınnan soñ Soğud Ğaräbstanı belän qoral satu kileşüen özep torırğa uylıy
Germaniyä kanślerı Angela Merkel’ Soğud Ğaräbstanına qoral cibärüne tuqtatıp toraçaqların belderde. Ul matbuğat cıyılışında Cämal Qaşıqçınıñ üterelüeneñ keşeleksez waqıyğa buluın häm bu xaqta Soğud patşası Salman bin Abdulaziz belän telefon aşa söyläşkändä dä äytüen assızıqladı.
Älege mas’älä xaqında Awrupa Berlege êçendä dä fiker alışular küp bula. Monnan soñ nindi säyäsät alıp baraçaqların planlaştıralar. Angela Merkel’ üz fikeren açıqladı. “Bez Germaniya tarafı bularaq bolay didek: bu räximsez waqıyğanıñ artqı planındağı çınbarlıq yaqtırtılğanğa qadär Soğud Ğaräbstanına qoral cibärmäyäçäkbez,”-dide kanśler.
Şul uq waqıtta, Germaniyä iq’tisad häm ênergetika ministrı Peter Altmayer da xökümätneñ Soğud Ğaräbstanına qoral satmasqa qarar birüen häm Awrupa däwlätläre urtaq poziśiyädä bulsa älege çaranıñ Riyadqa nığraq täêsir itäçägen belderde.
Soğud Ğaräbstanı - Germaniyäneñ bıyıl iñ küp qoral satqan däwlätlär arasında ikençe urında.
