Ênäle ciläklär

Avstraliyäneñ Kvinslend töbägendä citeşterelgän ciläklärneñ êçendä tegü ênäläre tabılu belän bäyle borçu Yaña Zelandiyägä dä çäçräde. Anda Avstraliyädän kiterelgän ciläklärne kibetlärdän cıydılar. Yaña Zelandiyäneñ iñ zur azıq-tölek şirkätläre importnı tuqtatu yaqlı.

Ênäle ciläk krizisı uzğan atnada Avstraliyäneñ Kvinslend töbägendä başlandı. Ber keşe kibettän ciläk alıp aşağannan soñ êçe awırtıp xastaxanägä möräcäğat’ itä. Anda ciläklärneñ êçenä ênä urnaştırıluı bilgele bula. Soñınnan tağın 9 keşe şundıy uq şiqayät’ belän tabibqa bara.

Kvinslend xakimiyäte citäkçelege ciläklär êçenä ênä urnaştırıp keşelärneñ sälamätlegen häm tarmaqnı qurqınıç astına quyuçılarnıñ 10 yılğa törmägä yabılaçağın belderde. Ğayeplelär turında xäbär birüçelärgä 100 meñ Avstraliyä dolları tapşırılaçaq.

Êçenä ênä urnaştırılğan ciläklär Viktoriyä, Könbatış Avstraliyä, Yaña Kön’yaq Uêl’s, Tazmaniyada da tabıldı.

Kvinslend ciläk citeşterüçelär cämğıyäte ênälärne êş cire belän qarşılıqları bulğan xezmätkär urnaştıruın farazlıy.

İlneñ zur supermarketları ciläk satularnı tuqtatu qararı çığardı. Şunnan soñ ciläkneñ bäyäläre yartılaş töşte. Citeşterüçelär tarmaqta êşläwçelärneñ sanın kimetäçägen belderde.