İspaniya Fälästin däwläten tanıy

İspaniyä xökümäte räise Pedro Sançes 28nçe mayda Fälästin däwläten räsmi räweştä tanıyaçaqların citkerde. Ul ilneñ parlamentında yasağan çığışında bolay di: “Süzlärneñ ğamälgä küçü waqıtı citte. Bu axırı tügel, başı”.  

Pedro Sançes İzrail xökümäte räise Bin’yamin Netan’yaxunıñ barlıq utnı tuqtatu çaqıruların işetmämeşkä salışuın, Fälästin belän bäyle bernindi tınıçlıq planı tözemäwen häm solıx, iminlek, totrıqlılıq öçen berdänber yul bulğan ike däwlätle çişeleşne qurqınıç astına quya başlawın belderde. Ul Fälästinne tanu qararınıñ qayber illärgä oşamayaçağın häm näticäläre bulaçağın belülären dä äytte. “Bu qararnıñ näticälären qabul itärgä äzerbez. Bez tınıçlıq mänfäğat’lären häm qıymmätlären yaqlıybız. Fälästingä atıluçı bombalar tuqtağanda, xäzerge xällär 21nçe ğasırnıñ iñ qarañğı çorı bulaçaq häm bez başıbıznı yuğarı totaçaqbız, çönki döres yulda buluıbıznı tanıyaçaqlar. Bez döresen êşlibez. İspaniyä öçen dä, tağın da imin häm totrıqlı Urta diñgez öçen dä döres bulğannı êşlibez”,-dip söyläde Pedro Sançes.     

İspaniyä parlamentı 2014nçe yılnıñ noyabrendä Fälästin däwläten tanu öçen qarar çığarğan ide. Şuña kürä 28nçe mayda ministrlar kabinetı yasayaçaq adım citärlek bulaçaq.