AQŞ İzrailgä 1 milliard dollarlıq qoral cibärergä äzerlänä

AQŞnıñ “Wall Street Journal” gazetı il idaräseneñ kimendä 1 milliard dollar bäyäsendäge qoralnı İzrailgä cibärü öçen Kongressqa mäğ’lümat birüen xäbär itte. Alar arasında tanklarğa östämä detal’lär, xärbi texnika häm minomyet buluı açıqlandı. Satunı tögälläw öçen Kongressnıñ rizalığın kötälär.  

AQŞ ilbaşı Djo Bayden 8nçe fevral’dä partiyäseneñ basımınnan soñ Milli iminlek memorandumın iğ’lan itte. Anda AQŞtan xärbi yärdäm aluçı häm bäreleşlärdä qatnaşuçı barlıq däwlätlärneñ xalıqara xoquqnı saqlawları häm gumanitar yärdämnärne kirtälämäwläre mäs’äläsendä ışandıruçı yazmaça garantiyä birüläre şart itep quyıla.  

Bayden 9nçı mayda yasağan belderüendä Räfaxqa zur höcüm yasağan oçraqta İzrailgä qoral yärdämen tuqtatıp toraçaqların citkerde. Anıñ bu süzlärenä AQŞnıñ Cömhüriyätçe partiyäse dä, İzrail yağı da reakśiyä belderde.  

AQŞ däwlät särqatibe Êntoni Blinken da 13nçe mayda İzrailneñ qayber oçraqlarda xalıqara xoquqqa turı kilüçe räweştä xäräkät itmäwen söyläwneñ urınlı ikänlegen äytte.