Hindstanda saylawlar 6 atna buyı baraçaq

Hindstanda 19nçı aprel’dä başlanuçı ğomumi saylawlar 6 atna buyı däwam itäçäk. Anda 1 milliardqa yaqın keşe federal’ parlamentnıñ asqı palatası bulğan “Lok Sabha” äğ’zaların bilgeläw öçen tawış birä.

Saylawlarda xökümät räise Narendra Modi citäklägän“Bxaratiya Janata” partiyäse liderlığında tözelgän “Milli demokratik ittifaq” belän 30dan artıq partiyäne berläşterüçe “Hindstan milli üseş külämle ittifağı” koaliśiyäse yarışaçaq.

545 urınlı İctimağıy palata “Lok Sabha” öçen saylawlar 5 yılda ber ütkärelä. Säyäsi partiyä yäisä ittifaqnıñ xökümät tözi aluı öçen kimendä 272 urınnı aluı möhim.

Täwge êtabı irtägä başlanaçaq saylawlarda tawış birü 26nçı aprel’, 7nçe, 13nçe, 20nçe, 25nçe mayda häm 1nçe iyün’dä bulaçaq. Näticälärneñ 4nçe iyün’dä açıqlanuı kötelä. Saylaw barlığı 7 êtaptan tora häm 6 atna buyı däwam itä.  

Yaqınça 1,4 milliard keşe yäşi torğan ildä 968 million tiräse saylawçı bar. Alarnıñ 18 millionı täwge tapqır tawış birä.

İl tarixındağı iñ ozın saylaw 4 ay däwam itä. Ul 1951nçe yılnıñ oktyabrendä başlanıp 1952nçe yılnıñ fevralendä tögällänä.