İzrail İranğa cawap biräçägen belderde

İzrail ğomumştab başlığı Gerśi Xalevi İrannıñ hawa höcümenä cawap biräçäklären äytte. Ul 13nçe aprel’dä bulğan dron häm raketa höcümendä “ciñelçä” zıyan kürüe söylängän xärbi bazağa bardı. Xalevi andağı çığışında bolay di: “Aldağısın qarıybız, adımnarıbıznı uylıybız häm bu qadär küp raketa häm keşesez hawa apparatınıñ İzrail territoriyäsenä oçırıluına cawap biräçäkbez”.

Däwlät telekanalı “KAN”da yasalğan belderüdä älege höcümneñ “kontrol’ itelüenä mömkinlek birüçe, qarşılıq kürsätelmäyäçäk häm töbäkne külämle suğışqa tartıp kertmäyäçäk” räweştä planlaştırıluı citkerelde.

Tapşıruda äytelgänçä, wäqalätlelär İrannıñ täwge tapqır üz territoriyäsennän turıdan-turı höcüm itüe arqasında wäzğıyät’neñ qızıl çikneñ tışına çığuın häm moña cawap birüneñ mäcbüri buluın söyli.  

İzrail xärbi-hawa köçläreneñ İranğa qarata höcüm öçen äzerleklären tögälläwe belderelä, tik anıñ ni räweşle bulaçağı açıqlanmıy. Bu İranda aldan äzerlängän üterülär häm kiñ külämle êlektron höcüm dä bulırğa mömkin.