İran kiçekmästän cawap biräçägen belderde

İran tışqı êşlär ministrı Xösäyen Ämir Abdullaxiyan, İzrail höcüm yasasa, tiz arada tağın da köçle häm külämle cawap qaytaraçaqların äytte. Yarımräsmi “Tesnim” xäbär agentlığı citkergänçä, ul Angliyä tışqı êşlär ministrı Dêvid Kêmeron belän telefon aşa söyläşte.

Abdullaxiyan wazıyfadaşına İrannıñ İzrailgä atna axırında yasağan höcümeneñ üz-üzen yaqlawğa kerüen, töbäktäge krizislarnıñ nigezendä İzrailneñ cimergeç säyäsäte yatuın citkerde. Ul Ğazzädä distälärçä meñ grajdanlını ütergän höcümnärgä Angliyäneñ teläktäşlek kürsätüen tänqıyt’läde. “Soñğı 6 ayda biçara Ğazzä xalqı östenä yözlärçä meñ tonna bomba atılğanda, İrannıñ diplomatik ob’yektlarına qırğıylarça höcüm itkän İzrail rejimına, BMO kileşüeneñ 51nçe maddäse nigezendä üz-üzen yaqlaw qısalarında, cawap qaytaruına Angliyäneñ bu qadär borçıluı şaqqattırğıç”,-dide Abdullaxiyan.

İran tışqı êşlär ministrı Tel-Avivnıñ höcüm itü plannarına qarata isä bolay dide: “Töbäktä kiyerenkelekneñ artuın telämibez. Tik İzrail rejimı macara teläsä, monnan soñğı cawabıbız tiz, tağın da köçle häm külämle bulaçaq”.

İsegezgä töşeräbez, 1nçe aprel’dä İzrail İrannıñ Dimäşq’tağı konsullıq binasına höcüm yasadı. Anda 7 wäqalätle ülde, 2se armiyä generalı. İran monı üz territoriyäsenä höcüm bularaq kürde häm 13nçe aprel’dä İzrailgä yözlärçä kamikadze dron, ballistik häm qanatlı raketa cibärde.