Qanqoyış däwam itä: qorbannar sanı arta

  İzrailneñ Ğazzä sızığına däwam itkän höcümnärendä ğomere özelgän fälästinlelärneñ sanı 31 meň 726ğa citkän.

Ğazzädäge Fälästin sälamätlek saqlaw ministrlığı 164 kön barğan höcümnär belän bäyle mäğ’lümatlar citkergän.

Ministrlıq belderüendä äytelgänçä, İzrail armiyäse soñğı täwlektä tağın 81 fälästinleneñ ğomeren özgän, höcümnärdä 116 keşe cäräxätlängän. 

Şulay itep höcümnärdä ğomeren yuğaltqan fälästinlelärneň sanı 31 meň 726 bulğan, 73 meň 792 keşe yaralanğan.

Sälamätlek saqlaw ministrlığı beldergänçä, cimereklär astında häm yul çitlärendä äle dä ülelär bar, läkin İzrail köçläreneň totqarlawı arqasında aşığıç yärdäm häm grajdannar saqlanu törkemnäre cimereklär astındağı mäyetlärgä barıp citä almıy.