Ğazzädäge port öçen 60 kön kiräk

Amerika Quşma Ştatlarınıñ saqlanu ministrlığı Ğazzä yarına gumanitar yärdämnär öçen qorırğa planlaştırılğan waqıtlıça portnı tözüneñ 60 kön däwam itä aluın belderde.

Pentagon süzçese Patrik Rayder köndälek matbuğat cıyılışında citkergänçä, älege êş öçen Virdjiniya ştatındağı 7 transport brigadası ğaskäriläre bilgelängän. Portnı tözü AQŞnıñ regiondağı berlektäşläre yärdämendä alıp barılaçaq.

Port qullanılışqa kergännän soñ Ğazzägä här kön 2 million keşegä ber tapqır aşarlıq rizıq kiterü mömkin bulaçaq. Jurnalistlar xäzerge waqıtta açlıqta yäşäwçe Ğazzä xalqınıñ här kön 6 million 600 meñ rizıqqa ixtiyacı barlığın äytep, tağın 60 kön kötü urınına nigä Ğazzädä bulğan portlarnı qullanmawların sorıy. “Aşığıç yärdäm öçen hawadan töşerü belän bu qadäresen êşli alabız”,-dip cawap birä süzçe.

Rayder AQŞ üzäk köçlär komandalığınıñ bügen irtän hawadan 11 meñ 500 keşelek rizıq atuın belderde. Ul qayber ärcälärneñ paraşyutları açılmıyça yärdäm kötüçe keşelärneñ östenä töşüe häm 5eseneñ ülüe turındağı xäbärlärne kire qağıp: “Barlıq yärdäm paketlarınıñ imin räweştä cirgä töşüe raslandı”,-dide.

Ğazzädä waqıyğa şahitläre häm xastaxanädä êşläwçelär, monnan tış, grajdanlı saqlanu berlege süzçese Mäxmüt Basal oçqıçlardan atılğan qayber ärcälärneñ paraşuıtları açılmawın, näticädä yöklärneñ keşelär häm öylär östenä töşüen, şul säbäple 5 keşeneñ ülüen häm yaralanuçılar barlığın citkergän ide.