Kobaxidze NATOnı Gruziyäne êlekkegä qarağanda tağın da kübräk yaqlarğa çaqırdı

Yens Stoltenberg Gruziyäneñ yaña baş ministrı İrakliy Kobaxidze belän Bel’giyä başqalası NATO ştabında küreşte.

Stoltenberg, NATOnıñ urtağı bulğan Gruziyäneñ (Görcestannıñ) suverenlığın häm cir bötenlegen yaqlawın belderep, Rusiyä yawlap alğan töbäklärdä annekśiya qararınıñ qabul itelmäslek buluına basım yasadı.

Gruziyä belän NATO arasındağı urtaqlıqnıñ tağın da kübräk niçek üsterelä alınaçağın qarap çığaçaqların bilgeläp uzuçı Stoltenberg: "Gruziyäneñ Awrupa-Atlantik ğailäsenä tulı äğ’zalegenä, tağın da kübräk demokratiyägä häm mullıqqa taba baruın kürergä telibez”, - dip äytte.

Kobaxidze dä wazıyfanı üz östenä alğannan soñ berençe çit il säfären Bryussel’gä, Awrupa Berlegenä häm NATOğa yasawnıñ ilen şuşı “ğailäneñ” öleşenä äylänü iradäsen, ixtıyarın çağıldıruın iskärtep uzdı.

İleneñ yıllar êçendä NATO liderlığındağı missiyälärdä häm operaśiyälärdä qatnaşuın belderüçe Kobaxidze monıñ üz-üzeñne saqlaw sälätläreneñ NATO belän ahäñle kiterelüenä öleş kertüen äytte.

Kobaxidze, il cirläreneñ 20%ınıñ yaw astında buluına basım yasap, NATOnı häm berlektäşlären ilen êlekkegä qarağanda tağın da kübräk yaqlarğa çaqırdı.

Gruziyä Baş ministrı monnan aldağı könne dä Awrupa Berlege Şurası başlığı Şarl’ Mişel’, Awrupa Berlege tışqı mönäsäbätlär häm iminlek yuğarı wäkile Josep Borrell häm Awrupa Berlege komissiyäseneñ kürşelärdän häm kiñäyüdän cawaplı äğ’zase Oliver Varhelyi belän küreşep söyläşkän ide.

Gruziyä dekabr’dä Awrupa Berlegenä namzät il statusın alğan ide.