Lüksemburg xalqı Fälästin däwläten tanırğa teli

Lüksemburg xalqı parlamentlarınıñ Fälästin däwläten tanuın taläp itep imza cıyu kampaniyäse başladı. Xäzergä qadär aña 2 meñnän artıq keşe teläktäşlek kürsätte. Kampaniyä Lüksemburg parlamentınıñ internet säxifäsendä urın ala. Anda Awrupa Berlege äğ’zası 27 ilneñ 9ınıñ, BMO äğ’zası 193 däwlätneñ isä 139ınıñ Fälästinne tanuı xäterlätelä.

İmza cıyu kampaniyäseneñ açıqlawında Fälästin däwläten tanunıñ älege ilgä ğadellek kiterü yulında simvolik häm ähämiyätle ber adım bulaçağı belderelä. “Qarar Lüksemburnıñ Fälästin xalqına barı xäyriyä belän genä yärdäm itmäwen, ber ük waqıtta alarnı däwlät bularaq qabul itüen kürsätäçäk” diyelä anda.

İmza cıyu kampaniyäsen oyıştıruçılar Fälästinne tanu öçen İzrailneñ monı êşläwen kötmäskä kiräklegen assızıqlıy. “İzrail Yordannıñ könbatış üzänlegendä yaña qanunsız toraq punktlar tözüdän tayçınmıy. Monnan tış, Ğazzägä qarata blokada mäs’äläsendä bernindi çikläwe yuq, bu isä regionda näfrät, köç qullanu häm totrıqsızlıqqa kiterde. Basıp alunı beterü öçen Fälästin däwläten tanu - berençe adım”,-di alar.

Lüksemburg qanunnarında bilgelängänçä, watandaşlar parlamentqa citkerergä telägän mäs’älälärdä imza kampaniyäse başlıy yäisä şäxsi ğariza yaza ala. 6 atna êçendä kimendä 4 meñ 500 imza cıyğan kampaniyälär parlamentta qarala häm televideniye aşa translyaśiyälänä.

2018nçe yılda ul çordağı Lüksemburg tışqı êşlär ministrı Djin Assel’born Awrupa Berlege illären Fälästin däwläten tanırğa çaqırğan ide.