İran 32 il öçen vizanı beterde

İran, turizmğa can örü maqsatınnan, 32 ilgä vizanı ber’yaqlı beterde.

Räsmi xäbär agentlığı İRNA citkergänçä, mädäni miras, hönärçelek häm turizm ministrı İzzätulla Zärgami başqala Tähranda oyıştırılğan kabinet cıyılışınnan soñ bu xaqta belderü yasadı. “Turizm ministrlığınıñ, bilgelängän östenleklär nisbätennän, 32 il öçen vizanı ber’yaqlı beterü täq’dimen ministrlar kabinetı xupladı,”-dide ul.

Zärgami xökümätneñ bu qarar belän ilneñ qapqaların dön’yağa açuın äytte.

“Bu bik qıyu häm aqıllı qarar. Bezneñ ministrlıq dön’yadağı keşelär belän êş itä. Häm bu ber’yaqlı vizanı beterü, çınlıqta, böten dön’ya keşeläre belän küreşep söyläşü digän süz”,-dip söyläde ministr.

İranğa kerü öçen viza kiräk bulmayaçaq illärneñ qaysıları ikänen räsmi zat atamadı.