Ğazzädä utnı tuqtatu iğ'lan iteläçäk

İzrail xökümäte Ğazzädäge “Xamas” xäräkäte belän äsir almaşu kileşüen häm 4 könlek waqıtlıça utnı tuqtatunı qabul itülären belderde.

Räsmi iğ’lan aşa äsir almaşu mäs’äläsen qaraw öçen xökümät räise Bin’yamin Netan’yaxu liderlığında cıyılğan ministrlar kabinetı raslağan qarar citkerelde. “Aña qarağanda, xatın-qız häm balalardan toruçı kimendä 50 totıqnıñ 4 kön êçendä irekkä cibärelüe häm bu waqıtta bäreleşlärne tuqtatıp toru küzallana” diyelä belderüdä. Anda, şulay uq, här 10 äsirneñ irekkä cibärelüeneñ utnı tuqtatuğa tağın ber kön östäyäçäge äytelä.

 İzrail yağı fikerençä, Ğazzädä “Xamas”nıñ qulında izraille 239 äsir bar.

“Xamas”tan yasalğan belderüdä dä Qatar häm Misırnıñ aradaşlığında ozın söyläşülär prośessı näticäsendä İzrail belän utnı tuqtatu kileşüenä ireşüläre citkerelde. Anıñ nigezendä, izraille 50 äsirgä almaşqa İzrail törmälärendä totıluçı 150 fälästinle irekkä cibäreläçäk. Bolarnıñ ike yaqta da 19 yäş’tän keçe xatın-qızlar häm balalar buluı kileşenä.

Kileşügä qarağanda, utnı tuqtatu 4 kön däwam itäçäk. Şul waqıt êçendä gumanitar yärdäm häm yağulıq taşuçı yözlärçä yök maşinası Ğazzägä keräçäk. Alarnı regionnıñ barlıq poçmaqlarına tarataçaqlar. Bu çorda İzrail köçläreneñ Ğazzädä berkemne dä qulğa almaw häm berkemgä höcüm itmäw qağıydäsen ütäyäçäge citkerelde.

Belderüdä Sälaxetdin yulı buylap tön’yaqtan kön’yaqqa keşelärneñ xäräkät irege saqlanaçağı assızıqlandı.

Qatar idaräse isä İzrail belän “Xamas” arasındağı bäreleşlärne gumanitar maqsattan tuqtatıp torunıñ qayçan başlanacağın 24 säğat’ êçendä iğ’lan itäçäklären belderde.