Putin Misır ilbaşı belän telefonnan söyläşkän

 Rusiya Federaŝiyäse däwlät başlığı Vladimir Putin Misır ilbaşı  Abdulfättah äs-Sisi belän telefonnan söyläşkän.

Bu xaqta Kreml’ belderüendä äytelä.

Söyläşüdä İzrail-Fälästin konfliktı turında süz barğan, ike yaq ta meňlägän bala häm xatın - qızlarnı kertep moňarçı kürelmägän tınıç xalıq ülemnärenä tirän borçıluların citkergän.

Söyläşü barışında qan qoyunı tiz arada tuqtatırğa, totqınnarnı azat itärgä häm Ğazzädä tınıç xalıqqa gumanitar yärdäm kürsätergä kiräklegenä basım yasalğan.

Rusiya belän Misırnıň da xalıqara xoquq nigezendä İzrail belän tınıçlıqta yäşäwçe bäysez Fälästin däwläten buldıru belän töbäktäge problemanı çişü yaqlı buluları assızıqlanğan.

Vladimir Putin Rusiya watandaşların Ğazzädän êvakuaŝiyäläw waqıtında Misırnıň yärdäme öçen Sisigä räxmät äytkän.