Bayden İzrailgä bara
AQŞ ilbaşınıñ İzrailgä säfärennän soñ Fälästin däwlät başlığı Mäxmüt Abbas belän küreşüe kötelä
Amerika Quşma Ştatları ilbaşı Djo Baydennıñ irtägä İzrailgä säfäre kötelä. Bu xaqta AQŞ däwlät särqatibe Êntoni Blinken Tel’-Avivta matbuğat oçraşuında citkerde.
Anıñ äytüençä, Bayden İzrailgä “Xamas”nıñ höcümnäre qarşında teläktäşlek yullaması yasayaçaq. Monnan tış, AQŞ ilbaşı İzrailgä höcüm itärgä teläwçe öçençe yaqlarğa monı êşlämäskä digän çaqıruın yañartırğa teli.
Blinken assızıqlağança, Bayden “Xamas” tarafınnan alınğan totıqlarnı irekkä çığaru öçen İzrail belän yaqın koordinaśiyä êçendä bulaçaq. AQŞ ilbaşınıñ säfär qısalarında İzrailneñ suğış maqsatları häm strategiyäse turında külämle brifing yasayaçağı belderelde.
Djo Bayden 18nçe oktyabr’dä İzrailgä säfärennän soñ Yordaniyägä baraçaq häm patşa Abdullax İkençe, Misır ilbaşı Abdulfättax äs-Sisi, Fälästin däwlät başlığı Mäxmüt Abbas belän küreşäçäk. Aq Yort süzçese Karin Jan-P’yer bu xaqtağı yazmaça belderüdä bolay di: “Bayden “Xamas”nıñ Fälästin xalqı abruyın häm üzbilgelänü xoquqın yaqlamawı turındağı süzlären yañartaçaq häm Ğazzädäge tınıç xalıqnıñ gumanitar ixtiyacları mäs’äläse xaqında söyläşäçäk”.
Şul uq waqıtta, Blinken Baydennıñ İzraildän operaśiyälärne tınıç xalıq arasındağı yuğaltularnı niçek azaytıp alıp baraçağı häm Ğazzädäge sivillärgä gumanitar yärdäm ağımın niçek täêmin itäçäge mäs’äläsendä mäğ’lümat alaçağın citkerde. “Yärdämnärneñ kiçekmästän Ğazzägä kerä başlawı kritik ähämiyätkä iyä,”-dip söyläde ul.
