Fälästindä Expo 2023 açıldı

İzrail yawlaw astında totqan Yordannıñ könbatış üzänlegeneñ Nablus şähärendä blokadanı beterü häm sänägät’ne täşwik itü maqsatı belän Fälästindäge iñ zur iqtisad yärminkäse Expo 2023 zur qatnaşu küläme belän açıldı.

Fälästin prem’yer-ministrı Möxämmäd Iştiyye açılışta yasağan çığışında Nablus qamawın beterergä waqıt citüen äytte.

Qamawnıñ cırlar häm teläklär belän tügel, ä mondıy yärminkä belän, berdäm bulıp häm bazarlarnı fälästinlelärgä açıp betäçägen beldergän Iştiyye tübändägeçä däwam itte: “Bu yärminkä - qamawnı beterüneñ berençe adımı. Nablusnıñ qabat Fälästin iqtisadınıñ başqalası buluın telibez. Nablus tarix buyı yawlawçılarğa onıtılmayaçaq sabaqlar birde.”

Nablusnıñ Sänägät’ häm säwdä palatası süzçese Yasin Duveykat ta 30 meñ kvadrat metrlık mäydanda oyıştırılğan çarada Yordannıñ könbatış üzänlegeneñ barlıq töbäklärendä xezmät häm citeşterü tarmaqlarınnan 120 şirkätneñ qatnaşuın äytte.

“Keşelärgä Nablusnıñ imin urın buluın, biregä kilä alaçaqların, şähärdäge kibetlärdä yöri alaçaqların häm restorannarda aşıy alaçaqların añlatırğa telibez,” – dide ul.

Fälästindäge iñ zur iqtisadi çara bulğan yärminkägä Yordannıñ könbatış üzänlege häm İzrail 1948 yılda yawlağan töbäktän 10 meñnärçä fälästinneñ kilüe kötelä.