Awrupa Berlege illäre tışqı êşlär ministrları berençe tapqır Kiyevtä cıyıla
Bu xaqta Awrupa Berlegeneñ tışqı êlemtälär häm qurqınçsızlıq säyäsäte yuğarı wäkile Jozep Borrel’ xäbär itte
Awrupa Berlegeneñ tışqı êlemtälär häm qurqınçsızlıq säyäsäte yuğarı wäkile Jozep Borrel’ Awrupa Berlegenä äğ’za illär tışqı êşlär ministrlarınıñ çirattağı cıyılışınıñ berençe tapqır Ukraina başqalası Kiyevtä uzaçağın belderde.
Ul bu xaqta Awrupa Berlege illäre tışqı êşlär ministrlarınıñ Berläşkän Millätlär Oyışmasınıñ 78 nçe ğomum şurası uñayınnan uzğan räsmi bulmağan cıyılışınnan yasağan belderüendä citkerde.
Borrel’ bilgeläp uzğança, Awrupa Berlege häm anıñ äğ’zaları BMO ğomum şurası qısalarında 133 il belän söyläşülär ütkäräçäk häm kön tärtibendäge mäs’älälär klimat üzgäreşe, totrıqlı üseş maqsatları, xalıqara finans arxitekturasında reforma häm Rusiyäneñ Ukrainadağı suğışı bulaçaq.
”Bez tınıçlıq formulasına mömkin bulğança küp sanda BMO äğ’zasınıñ yärdämen täêmin itü öçen Ukraina belän êşne däwam itärgä telibez. Monıñ öçen bezneñ barlıq ministrlar da partnyerları belän tığız êlemtädä toraçaqlar”,- dide ul.
Jozep Borrel’ Awrupa Berlege tışqı êşlär ministrlarınıñ cıyılışta Ukrainağa qurqınıçsızlıq yöklämäläre turında da söyläşüen belderde, kiläse atnalarda kötelgän tışqı êşlär ministrları cıyılışınıñ isä täwge tapqır Kiyevtä uzaçağın äytte.
