Liviyädä yañğır meñnärçä ğomerne özde

Liviyäneñ könçığışındağı su basularda barı Derna şähärendä genä dä ülüçelärneñ sanı 3 meñnän arttı. Töbäkneñ sälamätlek saqlaw xezmätläre beldergänçä, qaladağı wäzğıyät’ qotoçqıç.

Cirlek xökümäteneñ êçke êşlär ministrı İsam Äbu Zäribä Dernada köçle yawım-töşem arqasında ğomere özelgän 1500dän artıq keşeneñ üle gäwdäse tabıluın, yuğaluçılarnıñ isä 7 meñgä citüen belderde.

Derna muniśipal’ şurası äğ’zası Äxmät Ämdur sośial’ mediada yasağan bederüendä şähärdä bik küp bina häm toraqnıñ tulısınça su astında qaluın, asqormanıñ taşqın suları belän ağuın, töp yullarnıñ cimerelüen, däwlät häm şäxsi mölkättä ähämiyätle yuğaltular buluın citkerde.

Liviya milli berlek xökümäte süzçese Möxämmät Xammudä isä ilneñ könçığışındağı su basu afäte nisbätennän ütkärelgän kabinet cıyılışınnan soñ sośial’ media akkauntında belderü yasadı. Ul meteorologiyä mäğ’lümatlarınıñ Cäbäl äl-Axbar regionında terkälgän yawım-töşem külämeneñ yaqınça 400 millimetr kürsätüen, monıñ Liviyada 40 yıldan artıq waqıt êçendä kürelgän iñ köçle yañğır buluın äytte.

Su basu hälakätennän soñ Liviyä milli berlek xökümäte citäkçese Abdulxämid Dibäybä 3 könlek milli matäm iğ’lan itte. Ul zıyan kürgän cirleklärgä xalıqara yärdäm çaqıruı yasadı.

Naçar hawa torışı Liviyäneñ Bingazi, Bäyda, Märc häm Susä şähärlärenä dä yoğıntı yasadı.