İñ qıybatlı sır mäğarädä yasala

İñ qıybatlı sır rekordın İspaniya uzdırdı. İlneñ tön’yağında zäñgär Kabraless sırınıñ 2 kilo 200 gramm awırlığındağı ber kisäge aukśionda 30 meñ yevroğa satıldı. Şulay itep ul dön’yadağı iñ qıybat sır isemen aldı.

Sırnı äzerlägän Gil’yermo Pendasnıñ änise Roza Vada älege azıqnıñ 1400 metr biyeklektäge mäğarädä 7 gradus cılılıqta ölgerüen häm monda kimendä 8 ay toruın söyli. Sırnı Asturiyädä üzeneñ restoranı bulğan İvan Suares isemle keşe satıp ala.

Kabralessnıñ ğadäti bäyäse - kilosına 35-40 yevro tiräse.

Älege tör sır çi sıyır söte yäisä sıyır, sarıq häm käcä söte qatnaşmasınnan yasala. Ul Kabraless töbägendäge mäğarälärdä ölgerä.