Zelenskiy xärbi komissarlarnı êştän qudı

Ukraina däwlät başlığı Volodimir Zelenskiy rişwätçelek säbäple barlıq töbäk xärbi komissarların êşennän azat itte. Ul 11nçe avgustta belderü yasap, milli iminlek häm saqlanu şurasınıñ maxsus utırışında xärbi bülekçälärne tikşerüneñ näticälären qarawların äytkän ide. “Komissariatlarnıñ wäqalätlelärenä qarata tulayım 112 cinayät’ êşe açıldı, 33 şöbhä bar,”-dide Zelenskiy.

Ukraina däwlät başlığı barlıq töbäklärdäge xärbi komissarlarnı êştän azat itü turındağı qararnı imzaladı. Zelenskiy äytüençä, yañaları bilgeläner aldınnan iminlek xezmäte tarafınnan kontrol’ aşa uzaçaq.

Cirle matbuğatta çıqqan xäbärlärgä qarağanda, uzğan ay qayber töbäklärneñ xärbi komissariatlarınıñ xezmätkä çaqırılış waqıtında wazıyfalarınnan faydalanuları, rişwät aluları açıqlana.

Odessa xärbi komissarı Yevgeniy Borisov, İspaniyädä qıybatlı milke häm zinnätle maşinaları barlığı bilgele bulğannan soñ, qulğa alındı. Anı watandaşlarğa xärbi xezmätkä yaraqsız buluın dälilläwçe dokumentlar satuda ğayeplilär.

Dnepropetrovsk xärbi komissarınıñ da suğış başlanğannan birle ätise isemenä berniçä maşina terkäwe häm Dnipro şähärendä ike fatir satıp aluı citkerelgän ide.