"Vagner" Üzäk Afrika cömhüriyätenä yözlärçä ğaskäri cibärde

Rusiyä iminlek şirkäte “Vagner” Üzäk Afrika cömhüriyätenä 30nçı iyül’dä bulaçaq referendum aldınnan yözlärçä yaña ğaskäri cibärde. Alarnıñ cirle xärbi xezmätkärlärne öyrätü häm tärtip saqlaw öçen kitüläre belderelde.

“Telegram”da yasalğan açıqlawda yözlärçä ğaskäri urın alğan fotoräsem dä urtaqlaşıldı. Anda 5 yıldan birle “Vagner” öyrätkän Üzäk Afrika cömhüriyäte armiyäse, poliśiyäse häm jandarmeriyäseneñ ildäge iminlek däräcäsen arttıruda alğarış kürsätüe äytelä.  

Üzäk Afrika cömhüriyätendä 2 meñgä yaqın Rusiyä tüläwle ğaskäriye buluı farazlana. Ay başında ildäge “Vagner” berlekläreneñ qayta başlawı alğa sörelgän ide. Üzäk Afrika cömhüriyäte ilbaşı wäkile Al’bert Yaloke Mokpem älege süzlärneñ döres bulmawın häm ğaskärlärneñ barı urın üzgärtülären citkerde.

Üzäk Afrikanıñ däwlät başlığı Fosten Arşanj Tuadera 3nçe tapqır saylanırğa teli häm konstituśiyägä monıñ belän bäyle üzgäreş kertü öçen 30nçı iyül’dä referendum uzdıru qararı çığardı.