Rusiyä Qırım küperenä höcümne ğayıpläde

Rusiyäneñ terrorçılıqqa qarşı köräş komitetı Qırım küperenä Ukraina köçläre keşesez hawa aparatları belän höcüm yasawın citkerde. Belderüdä anı "terrorçı höcüme" dip atıylar.

Küpergä höcüm cirle waqıt belän tönge säğat’ 3 tulıp 5 minutta yasala. Anı Ukraina maxsus xezmät köçläre başqara häm monıñ öçen 2 dron qullanıla.

Belderüdä äytelgänçä, höcümdä 2 keşeneñ ğomere özelgän, 1 bala yaralanğan. Küperneñ maşina yulı öleşe zarar kürgän.

Rusiyä tışqı êşlär ministrlığı, Qırım küpereneñ grajdanlı asqorma buluın belderep, höcümne kisken ğayıpläwen citkerde. “Başqaruçılarnıñ açıqlanaçağı häm xökemnän qaça almayaçağına tulısınça ışanabız. Küpergä höcüm itkän keşesez hawa apparatlarınıñ Könbatışta yasaluı häm Könbatış illäreneñ bu operaśiyäne planlaştıru, yardam itü häm başqaruda rol’ uynawı açıqlansa, bu alarnıñ Kiyıv rejimınıñ terrorçılıq ğamällärendä qatnaşuın raslayaçaq”, - diyılä belderüdä.  

Qırım küperendä barlıqqa kilgän cimerelüneñ tiz arada tözekländereläçäge assızıqlana.

Rusiyä qanunsız anneksiyälägän Qırımnıñ gubernator wazıyfasın başqaruçı Sergey Aksyonov irtän belderü yasap, küperdä ğadättän tış xäl buluın citkerde. Näticädä anıñ aşa maşinalar ütep yörüe tuqtatılğan. “İminlek häm başqa xezmätlär êşçänleklären alıp bara,”- dide ul.

“RBK-Ukraina” xäbär säxifäse Qırım küpere strukturasında bozılu barlıqqa kilü turında mäğ’lümat çığardı. Xäbärdä küpergä höcüm yasaluı, anı Ukraina iminlek xezmäte belän xärbi-diñgez köçläre planlaştıruı häm su öste keşesez hawa aparatları yärdämendä başqaruı äytelä.