Yoqlarğa yatar aldınnan teşlärne çistartmaw yöräk awıruları qurqınıçın arttırırğa mömkin

 Yaponiyädä ütkärelgän tikşerenü kürsätkänçä, tönlä yoqlarğa yatar aldınnan teşlärne çistartmaw yöräk awıruları qurqınıçın arttırırğa mömkin.

“News Medical” xäbärenä qarağanda, teş çistartu yışlığı belän yöräk awıruları qurqınıçı arasındağı bäyläneşkä yünälgän tikşerenüneñ näticäläre dön’ya kürgän.

Tikşerenü qısalarında 2013-2016 nçı yıllar arasında Yaponiyäneñ Osaka universitetı xastaxanäsendä yatqan paśiyentlardan 1 meñ 675 keşe saylanğan.

Qatnaşuçılar 4 törkemgä bülengännär: könenä ike tapqır irtän häm kiç teşlären çistartuçılar, kiçen genä teşlären çistartuçılar, teşlären irtä belän genä çistartuçılar häm teşlären bötenläy çistartmawçılar.

Tikşerenüçelär qatnaşuçılarnıñ yäşen, cenesen, tämäke tartıp-tartmaw kebek üzençäleklären dä isäpkä alğannar.

Monnan tış qatnaşuçılarnıñ terkälep barğan sälamätlek yazmaları 4 bäysez tikşerenüçe tarafınnan tikşerelgän.

Tükşerüdä yöräk citeşsezlege, yöräk ritmı bozılu, yöräk öyänäge, kükräk awırtu häm operaśiya kiräktergän yöräk klapanı häm aorta awıruları kebek yöräk-qan tamırları awırularına iğ’tibar yünältelgän.

Köngä ike tapqır teşlären çistartuçılar häm kiçen genä çistartuçılarnıñ yöräk-qan tamırları awırularınnan isän qalu däräcäseneñ, teşlären bötenläy çistartmawçılar belän çağıştırğanda, şaqtıy yuğarı buluı açıqlanğan.

Tikşerenü näticäläre kürsätkänçä, teşlärne irtä belän genä çistartu citärlek tügel häm kiçen yatar aldınnan çistartu sälamätlek öçen bik möhim.

Tikşerenü näticäläre “Scientific Reports" jurnalında dön’ya kürgän.