Kaliforniyädä yortsızlar sanı arta
Ştatta öysezlär sanı 171 meñgä citkän
Soñğı yıllarda Amerika Quşma Ştatlarınıñ Kaliforniya ştatında yortsızlıq däräcäse küpkä artqan.
San - Franśisko universitetında ütkärelgän tikşerenüdä ştattağı yortsızlıq däräcäläre häm moña kitergän faktorlar tikşerelgän.
Tikşerenü kürsätkänçä, ştatta öysezlär sanı 171 meñ, bu Amerikadağı ğomumi sannıñ 30%ın täşkil itä.
Tikşerenü qısalarında 2021-2022 nçe yıllarda 3 meñ 200 öysez keşe belän soraştıru, alar arasınnan 365 keşe belän äñgämälär ütkärelgän.
Qatnaşuçılarnıñ 90%ı yortsız qalğançı älege ştatta yäşägän keşelär, bu keşelärneñ yartısınıñ sälamätlek problemaları, fizik kimçeleklär häm yäşe arqasında êşli almawı açıqlandı.
Älege keşelärneñ öylären yuğaltqançı urtaça aylıq kereme 960 dollar bulğan, êlegräk öy arendalap yäşägän yortsızlarnıñ aylıq 1400 dollar keremnäreneñ yartısı arendağa kitkän.
Êlek fatir yallap yäşägän qatnaşuçılarnıñ 20%tan artığı az kerem häm xezmät xaqı çikläwläre arqasında öylärennän çığarılğan.
Tikşerenüdä äytelgänçä, arenda bäyäläreneñ yuğarı buluı yortsızlıq däräcäsen arttırğan.
AQŞ az keremlelär öçen toraq assośiaśiyäse mäğ’lümatlarına qarağanda, ildä minimal’ xezmät xaqı belän säğatenä 15,50 dollar alğan keşe ber bülmäle fatirnı arendağa alu öçen atnağa 90 säğat’ êşlärgä tiyeş.
