"Amazon"nı tıçqannar basıp aldı
İnternet aşa satu firmasınıñ saqlağıçları kimerüçelär belän tulğan
Amerikanıñ internet säwdä şirkäte “Amazon”nıñ Franśiyäneñ Orlean şähäre tiräsendäge saqlağıçın tıçqannar basıp alğan.
Franśuz kanalı BFMTV kürsätkän videolarda kimerüçelärneñ ärcälär arasında yögereşüen kürergä bula. Biredä “Amazon” sata torğan azıq-tölek tä saqlana. Videolarda aşaw-êçü tutırılğan qaplarda üle tıçqan balaları küzgä taşlana. Şulay uq, qayber urınnardağı pıçraqlıq iğ’tibarnı cälep itä.
Kisätülärgä qaramastan, aylar buyı älege xilaflıqlarğa çara tabılmıy. Ul xezmätkärlärneñ dä, satıp aluçılarnıñ da sälamätleklären yanaw astına quya, şuña kürä borçu tudıra.
Şirkätneñ älege saqlağıçta êşläwçe ber xezmätkäre awırtu êläkterüdän qurquların, wäqalätlelärneñ bu xälgä bik isläre kitmäwen citkerä.
Anda êşläwçelär kerüçe hönäri berlek wäkile Jan-Silver Giyon da saqlağıçnı tıçqannardan çistartu öçen kürelgän çaralarnıñ citärlek bulmawın, tağın da näticäle yullar kiräklegen äytä.
“Amazon” isä kimerüçelärgä qarşı köräş törkemeneñ berniçä tapqır saqlağıçta êşçänlek alıp baruın, klientlarğa tıçqannar qağılğan ber tartmanıñ da cibärelmäwen alğa sörä.
