Artta qalğan illärdä här 5 baladan berdän artığı êşli

Dön’yanıñ artta qalğan illärendä här 5 baladan berdän artığı êşli.

Xalıqara xezmät oyışması häm BMOnıñ Balalarğa yärdäm itü fondı YUNİSEF äzerlägän mäğ’lümatlarğa qarağanda, dön’yada 160 million, şul isäptän 63 million qız häm 97 million ir bala êşli.

Bu kürsätkeç dön’ya külämendäge här 10 baladan berse digän süz. Artta qalğan illärdä êşçe balalar sanı artqannan arta bara.

İñ az üskän illärdä 5 yäş’tän 17 yäş’kä qadär bulğan 5 balanıñ 1 dän artığı sälamätlege häm üseşe öçen zararlı êştä êşli.

Afrika êşçe balalar sanı yağınnan berençe urında tora.

Afrika qıytğasında 5 balanıñ berse, yäğ’ni 92 mlllion bala êşli.

Aziya häm Tın okean ikençe urında tora. Bu töbäklärdäge balalarnıñ 5,6%ı, yäğni 49 million bala êşläw belän mäşğul’.

Amerika qıytğasında 8 million 300 meñ, Awrupa häm Uzäk Aziyädä 8 million 300 meñ häm Ğaräp illärendä 2 million 400 meñ êşläwçe bala bar.

Balalar sälamätlegenä, qurqınıçsızlığına häm äxlağına zıyan kiterä torğan êşlär dip bilgelängän qurqınıç êşlärdä êşläwçe 5 yäştän 17 yäş’kä qadärge balalar sanı 2016 nçı yıldan 6 million yarımğa artıp 79 millionğa citkän.

Êşçe balalarnıñ 48%ın 5 yäş’tän 11 yäş’kä qadärgelär, 28%ın 12-14 yäş’tägelär häm 25%ın 15 yäş’tän 17 yäş’kä qadärgelär täşkil itä.

Qurqınıç êşlärdä êşläwçelärneñ zur öleşe 5 yäş’tän 11 yäş’kä qadärge balalardan tora.