Türkiyädäge saylawlar dönya matbuğatında

Saylaw barışın baş bitlärennän uquçılarına citkerüçe Awrupadağı küp sandağı teleradiokompaniya häm gazet, 85%tan kübräk qatnaşu külämenä işarät itep, törek saylawçısınıñ saylawğa kürsätkän iğ’tibarın bilgeläp uzdı.

İngliz “The Guardian” gazetı, berençe bitendä saylawlarda yuğarı külämdä qatnaşunıñ buluına iğ’tibarnı yünältep: "Yuğarı külämle qatnaşu belän ütkärelgän Türkiyä saylawlarınıñ ikençe turı uzaçaq,” – dip yaza. Gazet 4nçe häm 5nçe bitlären dä tulısınça Türkiyä saylawlarına bağışlağan.

“The Independent” gazetı, Franśiyanıñ “France 24”, Germaniyada “Bild” häm “Welt” gazetları, Awstriyanıñ “ORF” däwlät teleradiokompaniyası Türkiyädäge saylaw xäbären "Türkiyä saylawnıñ ikençe turına bara” başçası belän uquçılarına citkerde.

Bolgariya milli televideniyäse xäbärendä dä: “Türkiyädä uzdırılğan saylawda (İlbaşı Räcäp Tayyip) Ärdoğan belän köndäşe “Cömhüriyät xalıq” partiyası (CHP) liderı Kemal’ Qılıçdaroğlu ikençe turda yarışaçaq. Här ikese dä berençe turda Däwlät başlığı saylawın ciñü öçen tawışlarnıñ kiräkle 50%ın ala almadı,” – dip äytelde.

İspaniyada “El Mundo” häm “La Vanguardia”, saylawnıñ ikençe turğa qaluın citkergän bulsa, “La Razon”: "Anketalarda äytelgäne kebek Türkiyädä İlbaşı saylawı axırına qadär tigez däräcädä uzdı. Ärdoğan partiyası parlamentta ciñde. Saylawlarda qatnaşu rekord däräcädä buldı,” – dip belderde.

İtaliyanıñ “ANSA” agentlığı da: "Türkiyä ikençe turğa bara. Ärdoğan 50%tan tübän" diyıp Türkiyädäge saylawlarnı citkerde.

Bel’giyanıñ franśuz telle zur tirajlı gazetı “Le Soir” yazmasın "Türkiyädä ilbaşı saylawında ikençe turğa taba” dip atağan.

Greśiyada “Ta Nea” gazetı näticäne ikençe turnıñ bilgeläyäçägenä basım yasadı.

Êstoniyanıñ “ERR” däwlät teleradiokompaniyası da, saylawnıñ ikençe turğa qaluın häm qatnaşunıñ 90% tiräsendä buluın xäbär itep, Türkiyädäge saylaw sisteması turında mäğ’lümat birde.

Pol’şanıñ “PAP” xäbär agentlığı saylaw näticälären, ayıruça Ärdoğan belän Qılıçdaroğlunıñ çığışların uquçıları belän urtaqlaştı.

Amerika Quşma Ştatlarınıñ tanılğan gazetları häm xäbär organnarı da Türkiyädäge saylawlarnı berençe xäbär bularaq citkerde.

Rusiyäneñ “Vzglyad” gazetı Rusiyäneñ bu saylawlarnı bik yaqınnan küzätep baruına iğ’tibarnı yünältte.

“Rossiyskaya Gazeta”: "Ärdoğan tawışlar tulısınça sanalğannan soñ 49,35% tawış aldı” dip atalğan yazmasında saylawnıñ ikençe turğa qaluın yazdı.

Süriyä rejimına yaqınlığı belän belengän “Watan” gazetı Türkiyädäge Prezident häm Parlament saylawlarına bağışlanğan xäbärendä tawış birü külämeneñ bik yuğarı buluına iğ’tibarnı yünältte.

“Baghdad Today” internet xäbär säxifäse dä: "Saylawnıñ ikençe turğa qaluınıñ Türkiyä tarixında berençe tapqır buluına” basım yasadı.

Fälästin matbuğatı da saylawnıñ ikençe turğa qaluın iskärtep uzdı.

İzrailneñ “Haaretz” gazetı da: "Ärdoğan berençe turda absolyut küpçelekne täêmin itä almağanı öçen Türkiyä ikençe tur tawış birügä bara,” – dip yazıp çıqtı.