NATO häm Awrupa Berlege Rusiyägä rizasızlıq belderde
Rusiyä däwlät başlığı Vladimir Putin comğa könne ber telekanalğa belderüendä Belarus’ta atom-töş qoralı urnaştıraçaqların söylägän ide
NATO häm Awrupa Berlege Rusiyäneñ Belarus’ta taktik atom-töş qoralları urnaştıru qararın “cawapsızlıq” dip atadı.
NATO süzçese Oana Lungesku älege mäs’älä turındagı sorawğa cawabında bolay di: “Rusiyäneñ atom-töş söylämnäre xätär häm cawapsızlıq. NATO uyaw. Xälne yaqınnan küzätep barabız. Rusiyäneñ atom-töş torışında bezneken üzgärtüne kiräkterüçe üzgäreş kürmädek”.
Lungesku Rusiyäneñ NATOdağı atom-töş urtaqlaşular turındağı sıltamalarınıñ başnı butawçı buluın äytep, ittifaqtağı berlektäşlärneñ xalıqara yöklämälärne ütäwen assızıqladı.
“Rusiyä qorallarnı kontrol’dä totu belän bäyle üz yöklämälären daimi räweştä boza, axırğısı Yaña START (Strategik qorallarnı kimetü) kileşüendä qatnaşuın tuqtatıp toruı ide”,-di Lungesku.
Awrupa Berlege tışqı mönäsäbätlär häm iminlek säyäsäte wäkile Djozef Borrel’ dä sośial’ media aşa belderü yasap, Rusiyä häm Belarus’qa reakśiyä belderde. “Belarus’nıñ Rusiyä atom-töş qoralların üzendä urnaştıruı kiyerenkelekne cawapsız räweştä köçäytü häm Awrupa iminlegenä yanaw bularaq qarala. Belarus’ monı äle tuqtata ala. Bu anıñ qararı. Awrupa Berlege östämä çaralarğa cawap birergä äzer” dip yazdı Borrell.
Rusiyä däwlät başlığı Vladimir Putin comğa könne ber telekanalğa belderüendä Belarus’ta atom-töş qoralı urnaştıraçaqların söyläde. Ul “Monı atom-töş qoralların cäyelderüne kisätüçe xalıqara yöklämälärne bozmıyça êşläyäçäkbez,”-dide.
