YouTube Trampnıñ akkauntın qabat açtı
AQŞnıñ êlekkege ilbaşı 2 yıldan soñ qabat sośial’ media platformasına ireşä ala
Sośial’ media platforması YouTube Amerika Quşma Ştatlarınıñ êlekkege ilbaşı Donal’d Trampnıñ akkauntın 2 yıldan soñ qabat açtı. “17nçe marttan başlap Donal’d J.Tramp kanalı açıq häm yaña kontent urnaştıra ala” dip xäbär itä platforma bu turıda. Şul uq waqıtta kanalnıñ, YouTube kiñlegendäge başqa kanallar şikelle ük, şirkät säyäsätenä alğa taba da buysınırğa tiyeşlege assızıqlana.
Donal’d Tramp xäzer YouTube kanalında yaqınça 2 million 600 meñ yazıluçısına ireşä häm ilbaşı kampaniyäse öçen reklama quya ala.
YouTube 2021nçe yılnıñ 6nçı ğıynvarındağı AQŞ Kongressı basqınınnan soñ, Trampnıñ kanalındağı videolarnıñ köç qullanuğa çaqıra aluınnan şiklänep, çikläwlär kertte. Şundıy uq wäzğıyät’ Feysbuk, İnstagram häm Twitterda da küzätelde. Alar Donal’d Trampqa qarata çikläwlärne YouTubetan alda betergän ide inde. Tik êşmäkär, şuña qaramastan, älegä platformalarda berni dä urtaqlaşmadı. Ul 2021nçe yılda üze açqan sośial’ media platforması Truth Socialdağı akkauntın aktiv räweştä qullana.
