Litva parlamentı "Vagner"nı terrorçı oyışma bularaq tanıdı

Litva parlamentı Ukrainada êşçänlek alıp baruçı Rusiyä şirkäte “Vagner”nı terrorçı oyışma bularaq tanuçı qararnı qabul itte. Anda şirkätneñ Ukrainada terrorçılıqqa tiñdäş sanaluçı ğamällär qıluı häm agressor Rusiyä yanında xärbi höcümnärdä aktiv räweştä qatnaşuı belderelä.

Qararda Rusiyä däwlät başlığı Vladimir Putinğa yaqınlığı belän tanılğan êşmäkär Yevgeniy Prigojin tözegän häm Awrupa Berlege belän Amerika Quşma Ştatlarınıñ sankśiyä isemlegenä kergän şäxsi xärbi şirkät “Vagner” - Rusiyäneñ külägädäge xakimiyäteneñ qoralı dip atala.

Monnan tış, qararda törkemneñ Üzäk Afrika cömhüriyäte, Sudan häm Mali şikelle däwlätlärdä êşçänlek alıp baruı äytelä. Amerika Quşma Ştatlarınıñ finans ministrlığınıñ anı “transmilli cinayät’ törkeme” dip atawı da iskä alına.

Litva parlamentı başqa illärne dä “Vagner”nı terrorçı oyışma bularaq tanırğa çaqıra.   

Şirkätne tözegän Prigojin älege qararğa cawap itep Twitterda bolay dip yazdı: “Litva – mikrodäwlät häm anıñ parlamentariylarınıñ qaraşları xätta kürşe illär Latviyä häm Êstoniyädä yäşäwçelärgä dä täêsir itmäyäçäk”. Monnan tış, ul älege qararnı qabul itüneñ “Vagner”nıñ êşçänlegenä bernindi yoğıntı yasamayaçağın da äytä.