Tön'yaq Koreya AQŞqa yanadı

Tön’yaq Koreya liderı Kim Çen-Innıñ qız tuğanı Kim Yo-Çjon ileneñ raketa sınawların Amerika Quşma Ştatları tıysa, bu suğış iğ’lan itü dip sanalaçağın äytte.  

Yonhap xäbär agentlığı citkergänçä, Kim AQŞ häm Kön’yaq Koreyanıñ barlıq xärbi xäräkätläreneñ küzätep barıluın beldergän. Ul Tön’yaq Koreyanıñ qıytğalararası ballsitik raketa oçırtu oçrağında AQŞnıñ anı şunda uk bärep töşeräçäge turındağı xäbärlärgä cawap birä.  Kim Koreya yarımutrawında berdäm xärbi sınawlar uzdıruçı AQŞ häm Kön’yaq Koreyanıñ illärenä qarata nindi dä bulsa tıqşınuına kiçekmästän qarşılıq kürsätergä äzer buluların äytä. Ul Tön’yaq Koreyanıñ raketa sınawlarınıñ AQŞnıñ yurisdikśiyäse tışında buluın söyli.

“Kürşe däwlätlärneñ iminlegenä zıyan birmiçä açıq sularda häm hawada uzdırılğan strategik qoral sınawlarına xärbi cawap birü Tön’yaq Koreyağa suğış iğ’lan itü sanalaçaq”-dide Kim.

Tön’yaq Koreya tışqı êşlär ministrlığı belderüendä isä yarımutrawda köçle bäreleşlär bulu mömkinlege turında kisätü yasala. Anda AQŞnı Kön’yaq Koreya belän urtaq xärbi öyränülärne tuqtatırğa çaqıralar.

Belderüdä xalıqara cämäğat’çelekneñ AQŞ häm Kön’yaq Koreyanıñ suğış öyränülären kiçekmästän tuqtatu öçen adım yasawı häm Tön’yaq Koreyanıñ töbäktäge tınıçlıq tırışlıqlarına öleş kertüe kiräklege citkerelä.