İranda uquçılarnı ağulaw oçraqları arta bara

İrannıñ törle töbäklärendä mäktäplärdä yaqınça 3 ay kürelüçe kümäk ağulanu oçraqların tikşerü êşe barğanda bik küp şähärdä tağın distälärçä uquçı qız ağulandı.

Tön’yaq Xorasan, Fars, Räzävi Xorasan, İsfaxan, İlam häm Xuzistan töbäklärendä yaña ağulanu oçraqları terkälde.

Wäqalätlelär Boknurd şähärendäge ike mäktäptän 46 qız balanıñ ağulanu simptomnarı belän xastaxanägä salınuın citkerde. Alar küñel bolğanu, xälsezlek häm baş äylänü şikelle şiqayät’lär belän möräcäğat’ itkän.

Fars töbägeneñ Şiraz häm Särvistan şähärlärendä dä 24 uquçı oxşaş bilgelär belän xastaxanägä salındı.

İlam töbägeneñ Äyvan, İsfaxan töbägeneñ Kaşan, Räzävi Xorasan töbägeneñ Mäşxäd häm Xuzistan töbägeneñ Axvaz qalalarında da distälärçä uquçı oxşaş zarlar belän xastaxanägä kiterelgän.

Süz uñayınnan, Xuzistan töbägeneñ 6 şähärendä älegä qadär 700 qız uquçınıñ ağulanuı, alarnıñ 200eneñ isä tabib küzätüe astında toruı belderelde.   

İranda uzğan yılnıñ 30nçı noyabrennän birle uqu yortlarında kümäk ağulanu oçraqları iğ’tibarnı cälep itä. Wäqalätlelär anıñ säbäben älegä tögäl açıqlıy almadı. “Uqu yortlarında qullanılğan ağuda diazot gazı êzläre barlığı bilgelände” digän belderü yasadılar.

Rejim oppoziśiyäse äytüençä, waqıyğanıñ artında İran idaräse êçendäge Mäxsä Ämini demonstraśiyäläre öçen üç alırğa teläwçe qayber radikal’ törkemnär tora.

Tähran idaräsenä yaqın çığanaqlar isä xalıqnı xakimiyätkä qarşı kotırtırğa maqsat itep quyğan êlementlarnı ğayepli.