Franśiyädä irtägä "qara kön" kötelä

Franśiyädä pensiyä yäşen 62dän 64kä citkerüne küzallawçı bäxäsle reformağa qarşı irtägä il külämendä massaküläm êş taşlaw häm protest çaraları kötelä. Anı inde aldan uq “qara kön” dip atadılar.

İlneñ iñ zur hönäri berlekläre irtägä ğomumi êş taşlaw qararı çığardı. Şul säbäple ildä tormış tuqtap qalu noqtasına kiläçäk. Transport, ênergetika, sälamätlek saqlaw häm mäğariftän başlap bik küp tarmaqlar älege çarada qatnaşaçaq.  

Bigräk tä poyızd säfärlärendä zur kimçeleklär buluı, qayber cirleklärdä kön däwamında transport ağımınıñ tulısınça tuqtawı kötelä.

İlneñ bayrağın yörtüçe hawa yulı şirkäte ÊyrFrans ta, aşığıç oçraqlarnı kertmägändä, här 10 oçıştan 2seneñ ğamäldän çığarıluın citkerde.

İl külämendä 1 million yarımnan artıq keşeneñ uramnarğa çığuı farazlana. Hönäri berleklär älege sannıñ tağın da zurraq bulaçağın belderde.

Franśiyä xökümäte räise Êlizabet Born ilbaşı Êmmanuêl’ Makronnıñ saylaw aldı wäğ’dälärendä äytelgän pensiyä reformasınıñ tormışqa aşırılacağın 10nçı ğıynvarda beldergän ide. Ul 1nçe sentyabr’dän başlap layıqlı yalğa çığu yäşeneñ här yıl 3 ayğa artıp 2030nçı yılda 62 dän 64kä citäçägen citkerde. Ä 2027nçe yılda isä pensiyäne tulısınça alu öçen 43 yıl vznos tüläw şartı kerteläçäk.

Älege bäxäsle reformağa qarşı Franśiyädä 19nçı ğıynvardan birle bik küp tapqır êş täşlaw häm protest çaraları oyıştırıldı.