İtaliyada batqan köymädä ülüçelär sanı torğan sayın arta

İtaliyäneñ Krotone şähäre sulıqlarında batqan qaçaq köymäsendä ğomere özelüçelärneñ sanı 61gä citte. Hälakät kiçä buldı. Anda 80 keşene qotqarırğa ölgerälär. Alarnıñ 21en xastaxanägä salalar. Berseneñ xäle awır buluı belderelä.

İtaliyä mediası ülüçelär arasında balalarnıñ da buluın citkerde.

Qıyalarğa bärelgännän son batqan köymädä yaqınça 250 keşe buluı uylanıla.

BMO ğomum särqatibe Antonio Guterriş sośial’ media akkauntı aşa bu faciğa xaqında belderü yasadı. “Tağın ber qurqınıç köymä hälakäte. Bu yulı İtaliyä yarlarında balalarnı da kertep distälärçä keşeneñ ğomere özelde. Şunı qabatlap äytäm: tağın da yaxşıraq tormış êzläwçe här keşe iminlek häm xörmätkä layıq. Qaçaqlar häm möhacirlär öçen ışanıçlı, qanunlı yullar kiräk” dip yazdı ul.