Finlyandiyä: "Şveśiyä belän qulğa-qul totınışıp NATOğa kerergä telibez"

Finlyandiyä ilbaşı Sauli Niinistö Şveśiyä belän ber ük waqıtta NATOğa kerergä teläwlären häm monıñ Türkiyäneñ qulında buluın belderde. Ul Şveśiyä xökümäte räise Ul’f Kristersson häm Norvegiyä xökümäte räise Gar Store belän oçraştı. Küreşü Şveśiyäneñ Xarspund şähärendä uzdı.

Liderlar oçraşudan soñ matbuğat cıyılışı uzdırdı. Sauli Niinistö andağı çığışında bolay dip söyläde: “Finlyandiyäneñ NATOğa kerü prośessı Şveśiyä belän bergä bara. Şveśiyä belän bergä qulğa-qul totınışıp NATOğa kerergä telibez. Tik bu mäs’älädä berni êşli almıybız, monı raslaw Türkiyäneñ qulında, Türkiyä xäzerge waqıtta närsä uylıy - belmim”.

Şveśiyä xökümäte räise Kristersson isä Türkiyä belän NATO söyläşüläreneñ däwam itüen belderde. “Skandinaviyä töbägeneñ üzenä xas şartları bar. Arabızdağı xezmättäşlek NATOğa tiränlek östäyäçäk. Şveśiyä häm Finlyandiyä NATOğa kergännän soñ bez ittifaqnıñ iñ tön’yağı bulaçaqbız,”-dide ul.

Norvegiyä xökümäte räise Gar Store isä Finlyandiyä belän Şveśiyäneñ NATOğa kerüen yaqlawların häm bu illärneñ ittifaqqa köç biräçägen citkerde. “Rusiyä torğan sayın küzallap bulmıy torğan xälgä kilde. Rusiyä Skandinaviyä illärenä qarata kiber köräş, gibrid suğış şikelle törle häm xätär ısullar qullana. Bu nisbättän qarağanda da, Şveśiyä häm Finlyandiyäneñ NATOğa kerä aluı ähämiyätle”,-dip söyläde Norvegiyä xökümäte räise.