Süriyädä xaräbälär astında tuğan bäbäyne meñlägän keşe alırğa teli

6nçı fevral’dä bulğan cir teträwdän soñ Süriyädä işelgän ber binanıñ xaräbäläre astında dön’yağa kilgän qız balanı ğailäsenä alu öçen meñnärçä keşe möräcäğat’ itkän.

Bu xäl Arfin töbägeneñ Cindäräs toraq punktında buldı. Xaräbälär astında tuğan bäbäygä Aya (Moğciza) iseme birelde. Ul qotqarılğanda äle änisenä kendek bawı belän bağ’lı ide.

Ayanıñ änise, ätise häm 4 qardäşe cimereklär astında qalıp ülde.

Bala älegä xastaxanädä. Anı qarawnı üz östenä alğan tabib Xani Maruf äytüençä, xastaxanägä kiterelgändä Aya bik awır xäldä bulğan. Xäzer äybätlänep kilä.   

Yaña tuğan bäbäyne qotqaru mizgelläre sośial’ mediada bik küp qaraldı. Videoda xaräbälärdän tuzanğa batqan bäbäyne alıp çıqqan ir-at kürenä ide. Älege keşe ğailäneñ yıraq tuğanı Xälil äl Suvaydi bulıp çıqtı. Ul Ayanı qotqarılğannan soñ Afrindağı ber xastaxanägä iltkän.

Sośial’ mediada meñnärçä keşe bäbäyne niçek itep balalıqqa alıp buluı turında soradı. Xastaxanä mödire Attiax Xalid äytüençä, alarğa da dön’yanıñ här poçmağınnan şaltıratıp, Ayanı tärbiyägä alırğa teläwlären beldergännär. Xalidnıñ üzeneñ dä Ayadan 4 ay ğıne zurraq bäbäye bar ikän. Ul: “Xäzergä anıñ berkemgä dä balalıqqa birelüenä yul quymayaçaqmın. Yıraq tuğannarı kire kilgängä qadär üz balam şikelle qarayaçaqmın,”-dide.

Ayanıñ tuğan cire Cindärästä isä keşelär äle haman xaräbälär astınnan yaqınnarın êzli. Töbäktäge jurnalist Möxämmät Äl Adnan BBCgä belderüendä bolay dide: “Xäl qotoçqıç. Xaräbälär astında bik küp keşe bar. Äle çığarılmağannar şaqtıy”.