Bu yulı Qor’änne yandırırğa röxsät itmädelär

Şveśiyädä Daniyäneñ çiktän tış uñçı “Qatğıy yünäleş” partiyäse liderı Rasmus Paludannıñ provokaśiyäsennän soñ bu yulı Türkiyäneñ Stokgol’mdağı ilçelege qarşında Qor’än-i Kärimneñ yandırıluına yul quymadılar.

Stokgol’m poliśiyäseneñ wäkile Ola Österling ber keşeneñ Türkiyä ilçelege qarşısında izge kitapnı yandırırğa röxsät sorawın, tik aña tiskäre cawap birelüen belderde. “Qarar çığarğançı Şveśiyä küzläw oyışması SEPO belän bu mäs’älädä söyläştek. Näticädä, älege keşegä bu ğamälen başqarırğa röxsät birmäskä buldıq,”-dide ul.

Qor’änne yandırırğa röxsät sorawçı keşeneñ kem ikäne äytelmäde.

İsegezgä töşeräbez, Şveśiyäneñ başqalası Stokgol’mda 21nçe ğıynvarda Daniyäneñ çiktän tış unçı partiyäse liderı Rasmus Paludan Türkiyä ilçelege qarşında Qor’än-i Kärimne yandırdı. Bu ğamälen ul küpsanlı poliśiyä xezmätkärläreneñ sağı astında başqara, anıñ yanına berkemneñ dä yaqınlaşuına röxsät birelmi.

Şveśiyä xökümäteneñ Qor’änne yandıru öçen Paludanğa röxsät birüenä Türkiyädän başlap bik küp islam däwläte rizasızlıq belderde.  

Paludan 27nçe ğıynvarda Daniyada mäçet qarşında häm Türkiyäneñ Kopengagen ilçelege qarşında da Qor’än-i Kärimne yandırdı.

Niderlandta Könbatışnıñ islamlaşuına qarşı rasaçıl xäräkätneñ liderı Êdvin Vagensvel’d Gaaga şähärendä Qor’änne yırtqan ide.