Parkinsonnan däwa bar

Qıtay fän ähelläreneñ Parkinson çirenä qarşı uylap tapqan käwsä küzänäkläre belän däwalaw maymıllarda uzdırılğan täcribälärdä êffektiv näticä birde.  

“South China Morning Post” gazetınıñ xäbärenä qarağanda, Kunming fän häm texnologiyä universitetı ğalimnäre älege primatlarda Parkinson simptomnarın beterügä ireşte.

Tikşerenüçelär käwsä küzänäklärne maymıllarnıñ baş miyenä urnaştıra. Parkinson täêsirendä baş miye funkśiyäläre xäräkät itä almastay däräcädä bozılğan xaywannar 2-3 atna digändä ayaqqa qalqıp, üzläre tuqlana başlağan.  

Xaywannarnı 5 yıl buyı küzätälär häm däwalawnıñ yoğıntısınıñ qaluın, waqıtlıça tügellegen kürälär.

Tikşerenüçelär däwalaw öçen keşeneñ kendek bawınnan alınğan mezenximal’ käwsä küzänäklärenä dofamin sintezı yasaluın täêmin itüçe 3 gen küçerde. Başta täcribä tıçqannarda ütkärelä. Ul uñışlı çıqqannan soñ 2017nçe yılda maymıllarda sınap qarıy başlıylar.

Genetik modifikaśiyälängän käwsä küzänäklär keşelärdä dä uñışlı çıqsa, bu - Parkinsonğa qarşı oçsız häm näticäle däwalaw yulı bulaçaq.   

Ğalimnär alğa taba däwalaw ısulınıñ qurqınıçsızlığı häm qullanılışqa kerüe öçen detal’lär östendä êşläyäçäk. Şunnan soñ keşelärdä kiñ külämle klinik täcribälär ütkärelüe kötelä.

Dön’ya külämendä Parkinson 60 yäş’tän ölkän keşelärneñ kimendä 1%ında oçrıy. Ul xäzerge çornıñ iñ kiñ taralğan degenerativ baş miye xastalığı sanala. Anıñ säbäbe älegä bilgele tügel. Xastalıqqa baş miyendä gäwdäneñ xäräkätlären tärtipkä saluçı dofamin ênzimın yasap çığaruçı nerv küzänäkläreneñ kimüe êtärgeç bula dip farazlana.