Netan'yaxu Ukrainağa xärbi yärdäm cibärü turında uylıy

İzrail xökümäte räise Bin’yamin Netan’yaxu Ukrainağa xärbi yärdäm cibärü turında uylawların häm “İrannıñ qoral çığaruına qarşı xäräkätkä küçülären” äytte.

Ul Amerikanıñ CNN televideniye kanalına interv’yusında İzrail yasıy torğan Timer gömbäz hawa saqlanu sisteması belän Ukrainanı da täêmin itü turındağı sorawğa: “Monı, hiçşiksez, qarayaçaqmın” dip cawap birde.

Netan’yaxu Amerika Quşma Ştatlarınıñ İzraildä totqan suğış qorallarınıñ ber öleşen Ukrainağa cibärüen belderde. “Monda detal’lärgä kerep tormıym: İzrail İrannıñ Ukrainada qullanılğan qorallarnı citeşterüenä qarşı xäräkätkä küçä,”-dide ul.

Netan’yaxu atna axırında İrannıñ İsfaxan şähärendä saqlanu ministrlığına qarawçı qoral citeşterü ob’yektına keşesez hawa apparatları belän oyıştırılğan höcümneñ artında İzrailneñ toruı turındağı süzlärne raslamadı da, kire dä qaqmadı.  

“Min ayırım ber operaśiyä turında ğına äytmin. Yaqın Könçığışta şartlaw bulğan sayın İzrail ğayeplänä yäisä aña törtep kürsätälär. Qayçaq bezneñ êşebez bula, qaywaqıt bezneke tügel,”-dide ul.

İzrail xökümäte räise İrannıñ Ukraina suğışında Rusiyägä qoral cibärüenä qağılışlı bolay dip söyläde: “İrannıñ üz xalqına qarşı kürsätkän varvarlığı arqasında dön’ya älege ilneñ närsä buluın añlıy başladı. İran Awrupanıñ urtasında Ukrainada ber ğayepsez grajdanlılarnı üterüçe keşesez hawa apparatların täêmin itä,”-dip söyli Netan’yaxu.

Ul İrannıñ atom-yöş qoralı qulğa töşerüen kirtäläw öçen xökümät räise bularaq mömkin bulğannıñ barısın da êşläyäçägen äytte.

Netan’yaxu söyläwençä, Ukraina suğışı başlanğan çorda aña aradaşçılıq täq’dim itelgän, tik ul waqıtta oppoziśiyädä buluı arqasında bu rol’ne qabul itmägän. Ul älege çordağı xökümät räise Naftali Bennetnıñ tırışıp qarawın, tik buldıra almawın telgä aldı.  

Netan’yaxu aradaşçı bulu täq’dimen kemneñ yasawın beldermi, tik monıñ ğayreräsmi kanallar aşa üzenä citkerelüen söyli. Ul barlıq yaqlar, bigräk tä, AQŞ teläsä, bu wazıyfanı başqara alaçağın äytä.