Makron Ukrainağa xärbi oçqıç cibärügä qarşı tügel

Franśiyä ilbaşı Êmmanuêl’ Makron kiräkle şartlar täêmin itelgän xäldä Ukrainağa xärbi oçqıç cibärelüneñ mömkin ikänen äytte. Ul Niderlandqa säfäre qısalarında xökümät räise Mark Rutte belän oçraştı häm soñınnan urtaq matbuğat cıyılışı uzdırdılar.

Makron söyläşüdä Ukraina mäs’äläsen qarawların häm ilgä här maydanda, kirägençä qadär yärdäm itärgä qararları nıq buluın äytte. Ul Ukrainağa xärbi oçqıç cibärü belän bäyle sorawğa “Ber variantqa da bulmas dimibez”  dip cawap birde.  Makron äytüençä, kiyerenkelekne arttırmasa, Rusiyä cirlärendä qullanılmasa häm Franśiyä armiyäseneñ köçen zäğıyf’lätmäsä - Ukrainağa xärbi oçqıç birelä ala. Monıñ öçen Ukrainanıñ räsmi sorawı kiräk. Tik ildän älegä mondıy teläk belderelmägän.

Süz uñayınnan, Franśiyä saqlanu ministrı Sebast’yen Lekornu Franśiyä häm Avstraliyäneñ Ukrainağa meñnärçä 155 millimetrlı gaubiśa snaryadları cibäräcägen belderde. Berençe tapşırular kiläse atnada başlanaçaq.

Şul uq waqıtta Vengriyä saqlanu ministrı Kristof Salay-Bobrovniśkiy üz ile häm Avstriyäneñ suğışnı tağın da ozaytmas öçen Ukrainağa qoral cibärmäyäçägen äytte.